Pasak-an ang EWAS level sa Mandaue

CEBU, Philippines — Gikinahanglan nga isumiter ngadto sa Regional Joint Control Center (RJCC) sa kapolisan sa Dakbayan sa Mandaue ang ilang endorsement kon gusto niini nga ipaubos sa orange alert level ang maong siyudad karong election period.

Ang Mandaue City Police Office (MCPO) mirekomendar kini ngadto sa Commission on Elections ug Police Regional Office (PRO-7) nga pasak-an ang Election Watch List Areas (EWAS) gikan sa yellow ngadto sa orange level.

Gustong malikayan sa kapolisan sa dakbayan nga adunay makalas nga kinabuhi nga adunay kalabutan sa piniliay.

Matud ni Police Senior Supt. Julian Entoma ang hepe sa MCPO nga aduna usab silay namonitor nga presensiya sa mga armadong grupo sa dakbayan.

Si Atty. Jerome Brillantes ang acting election supervisor miingon nga ang RJCC maoy mosusi kon angayan ba nga isaka sa orange alert level ang Mandaue.

“They will endorse it sa RJCC considering nga ang Dakbayan sa Mandaue is a highly urbanized city. I-endorse nila sa RJCC weather or not to grant ang request nga ibutang ang City of Mandaue sa EWAS,” pamahayag ni Brillantes.

Ang orange alert nagpasabot kini nga adunay “intense political rivalry ug naay presence of armed men nga ma-utilize by either party to affect the peace and order sa election,” dugang sa election supervisor.

Gikinahanglan lang nga adunay suporta sa pangangkon sa MCPO aron kini maaprubahan.

Kon mapaubos sa orange alert ang Mandaue, matud ni Brillantes nga magdugang og polis sa dakbayan pagsiguro nga luwas ug malinawon ang eleksiyon sa dapit.

“Ang ato man gud is preemptive. We will not wait and see. Ato gyud pugngan. Ang atong giprotektahan ani is the will of the voters to vote. You give them peaceful election then you will give them free will to elect or select sa ilang kandidato” asoy ni Brillantes. (/DILT)(BANATNEWS)