CEBU, Philippines — Moabot sa 12 mil ka business establishments ang naka-renew sa ilang Environment Sustainability Action Plan (ESAP) permit sa Cebu City Environment and Natural Resources Office (CCENRO) karong tuiga.
Mao kini ang labing uwahing datos sa CCENRO human manawat sila og renewal applications gikan sa Enero 4 hangtod na sa Enero 25, 2019. Ang pagkuha og ESAP lakip sa rekisitos nga gipangayo sa City Government sa renewal sa business permit matag tuig. Kini subay na sa City Ordinance No. 2243 nga nagmando sa mga firms nga mosumetir og ESAP.
Ang ESAP naglangkub sa environmental plans sa matag establisyemento sama sa soil conservation, vegetation program, anti-smoking, gray water treatment, coastal clean-up, waste segregation, composting, plastic regulation ug uban pa. Gipahibawo sa pangulo sa CCENRO nga si Nida Cabrera nga sa bag-ong palisiya nga ilang giimplementar karon, ilang aprubahan ang applications sa adlaw nga kini giproseso.
Subay kini sa direktiba ni Mayor Tomas Osmeña nga dili langayon ang pag-release sa gikinahanglang dokumento alang sa renewal sa business permits. Si Cabrera miingon nga ang team sa CCENRO mopahigayon og inspection sa tanang renewed ESAP aron pagsiguro nga nisunod sila sa kun unsay anaa sa ilang action plan. Kadtong mga establisemento nga mapakyas sa pagkuha ug renew sa ESAP mobayad og penalty sa City Treasurer’s Office.
Laing gibutyag sa CCENRO nga dili nila aprubahan ang application sa usa ka firm kon adunay pending penalty sa CTO.
Matud ni Cabrera ang pag-mandato sa mga firms nga mokuha og ESAP mo-edukar sa mga business owners nga motuman sa existing environmental laws. (BANAT NEWS)