CEBU, Philippines — Usa sa mga nasubo si Pope Francis sa gidangatan sa mga biktima sa pagpamomba didto sa atubangang bahin sa Mt. Carmel Cathedral sa Jolo, Sulu atol sa Santos ng Misa niadtong Domingo.
Atol sa pagtak-op sa World Youth Day nga gipahigayon sa Panama, nipadangat siya sa iyang pag-ampo ngadto sa mga nakalas ug nasamdan sa Jolo.
Samtang si Fr. Romeo Saniel, apostolic administrator sa Jolo, nibutyag kasagaran sa mga nakalas iyang mga higala maong nasubo siya ug nagampo nga mahatagan sila og hustisya.
Si Bishop Guillermo Afable of Digos, World Apostolate of Fatima of the Philippines, National Spiritual Director, niawhag sa tanan nga mag-ampo sa novena gikan sa Enero 28 ngadto sa Pebrero 5 alang sa mga biktima.
Samtang ang rector sa Cebu Metropolitan Cathedral Msgr. Ruben Labajo nga tungod sa nahitabo gipahugtan seguridad sa simbahan.
Ang impluwensyadong lider sa mga Muslim nga nasud sa kalibotan nga si Yousef Al-Othaimeen, secretary-general sa 57- ka nasud nga Organization of Islamic Cooperation mipadayag sa iyang dakong kasubo sa hitabo ug kasuko batok sa mga namomba.
Matud niya, ang OIC dili motugot sa bisan unsang matang sa bayolente, ekstremista ug terorismo nga buhat.
Samtang si United Nations Secretary-General António Guterres mipaabot usab og pahasubo sa pamilya sa mga biktima ug nanawagan sa gobiyerno sa Pilipinas nga silotan ang mga mamumuno aron mahatagan og hustisya ang mga biktima.
Si Canadian Prime Minister Justin Trudeau mihulagway sa hitabo nga “despicable act of cowardice.”
Samtang si Russian President Vladimir Putin mipaabot usab sa iyang pahasubo sa mga pamilya sa nakalas ug nangaangol.
“A crime committed against civilians who had congregated for church services is shocking in its cynicism and cruelty. I expect that the masterminds and perpetrators of this crime will sustain the punishment they deserve,” matud pa ni Putin ug midugang nga andam iyang nasud motabang sa Pilipinas batok sa mga terorista.
Ang East Asian and Pacific Affairs sa US State Department miingon nga magpabilin ilang supporta sa Pilipinas batok sa terorismo samtang ang World Bank mipadayag nga andam kining mosuporta sa Pilipinas. AP