CEBU, Philippines – Mokabat P1.43 milyon nga gidudahang shabu nasakmit gikan sa duha ka gipasanginlang durugista sa mga sakop sa Talamban Police Station Huwebes sa gabii sa Sitio Tabok, Barangay Pit-os sa Dakbayan sa Sugbo.
Ang mga dinakpan giila nga silang Lyle Echaure Leyson, 22, taga Barangay PulangBato ug Edwin Carbajosa Balasbas, 20, taga Sitio Tabok, Barangay Pit-os. Nakuhaan sila og usa ka dakong putos, duha ka medium nga pakete ug tulo ka gagmay’ng paketeng gituohang shabu nga motimbang og 153.53 gramos.
Si PO3 Jude Jacquez, imbestigador sa Police Station 8, miasoy nga nigawas ang ngalan sa giingong suspetsado sa Badac Watchlist - High Value Target kini nila.
“Dugay dugay na gyud ni namo siya gi under surveillance, mao ‘tong gabii napalitan gyud siya, nya nag abang na siya para lang sa ilang ilegal nga transaction. Naa nami source asa gikan ang drugs pan di gyud ni sila motug-an,” matud ni Jacquez.
Ang duha pasakaan og kasong kalapasan sa Sec. 5 og Sec. 11 art. II of R.A 9165.
Samtang lima sab ka mga gipasanginlang durugista ang nangadakpan sa managlahing buy bust operations sa mga sakop sa kapolisan sa Presinto 3 sa Lapu-Lapu City Police Office (LLCPO) sa miaging Huwebes sa gabii.
Si Police Chief Inspector Wyne Magbanua, hepe sa Presinto 3 ang operasyon gihimo sa Purok Shooting Star, Purok Ampalaya ug Purok Kalabasa sa Barangay Gun-ob.
Ang nangadakpan mao sila si Joserey Godinez delos Santos, Johnrey Amores Degamo, 26, Narciso Degamo Omolon, 67, Mark Anthony Candeliada alyas Mak-Mak , 28, Jay-ar Tumulak.
Ang mga dinakpan nakuhaan og mga pinaketeng gidudahang shabu gikatakdang pasakaan og kasong paglapas sa RA 9165. (Nichole Alexis A. Abas/IBM)(BANAT NEWS)