CEBU, Philippines – Patay ang usa ka panday human kini pusila sa wala mailhing mamumuno diha sa Sitio Sambagan, Barangay Tabunok, Dakbayan sa Talisay niadtong Miyerkules sa gabii.
Ang biktima mao si Mamerto Abarquez, Jr., 39-anyos, adunay kapuyo, nagpuyo sa maong dapit.
Sa imbistigasyon sa kapolisan nga sa wala pa mahitabo ang insidente naglingkod lang ang biktima diha sa nagparada nga traysikol sa ilang lugar.
Ang iyahang kapuyo nga si Jessica Tempos nitug-an nga upat ka higayon nga gipusil si Abarquez sa lalaking nagsul-ob og bonnet samtang ang back-up niini naghuwat diha sa 20 ngadto sa 30 metros ang gilay-on.
Daling nisibat ang mga mamumuno ug si Abarquez gidala ngadto sa Talisay City District Hospital sakay sa traysikad apan pag-abot sa maong tambalanan gideklara kini nga patay na nga naabot. (Gabriel C. Bonjoc/BDB)
300 ka ambulant vendors nitambong sa general assembly
Gipahigayon kagahapon diha sa 4th floor sa social hall sa legislative building sa Cebu City hall ang labing una nga general assembly karong tuiga sa ambulant vendors sa Unit 1, 2 ug 3 sa Carbon Public Market diin gituki ang ilahang mga katungod ug responsibilidad.
Si city market administrator Atty. Winefredo Orcullo nagkanayon nga sayod sila nga ang merkado gubot gyud ug usa sa mapasanginlan ang mga ambulant vendor nga naa sa gawas.
Hinungdan nga ilahang gipahinumdoman ang mga ambulant vendor sa mga obligasyon niini ug mga katungod.
Gawas niini, nagpahinumdom usab ang market authority sa proper handling sa mga baligya sa ambulant vendors.
Kapin sa 300 ka ambulant vendors ang nitambong sa maong general assembly.
Nasayran nga wala pa mahuman ang edipisyo sa Unit 2 sa Carbon Public Market gumikan kay daghan pa kini og isyu sa legalidad.
Hinuon si Orcullo ni-follow up naniini aron masulbad ang problema ug mapadayon na ang construction sa edipisyo.
Sa tibuok Carbon Public Market moabot ngadto sa 1,300 ang lehitimo o kining mga contract holder nga ambulant vendors apan katunga usab niini ang naa sa gawas nagkatag.
Gibutyag ni Orcullo nga duna sila’y long term plan alang sa mga ambulant vendor. (/BDB(BANAT NEWS)