Dili motuman sa EO usa ka tuig nga ipasirado
CEBU, Philippines – Gipahimangnoan sa kagamhanan sa Dakbayan sa Sugbo ang tanang establisamento sa siyudad sa hugot nga pagpatuman sa Executive Order No. 44 kun “Liquor and Entertainment Ban” karong Domingo.
Si Konsehal Dave Tumulak, chairman sa Sinulog Foundation Inc. executive committee nibutyag nga ilaha nang gibalibaran ang application sa usa ka establisamento tungod kay duol ra kaayo kini sa rota sa Sinulog.
Samtang aduna sila’y giaprobahan nga lima ka permit applications sa pagpahigayon og concert nga layo sa rota sa Sinulog.
Gidili karong Domingo ang mga kalihokan sama sa concerts, shows, performances, gigs, events, street parties ug ang pagmontar og loud speakers sa rota sa Sinulog grand parade, procession ug diha sa dalan Escario.
Ang rota sa grand parade manukad sa Imus Road ngadto Gen. Maxilom Avenue padulong sa Fuente Osmeña, patighog sa Osmeña Boulevard ug motapos diha sa Cebu City Sports Center.
Matud ni Mayor Tomas Osmeña nga iyang imando ang pagpasira sulod sa usa ka tuig sa mga establisamento nga mosupak sa iyang EO. (/BDB)(BANAT NEWS)
- Latest
