Re-blocking sa mga sitio sa duljo nga nasunog gisugdan sa dwup
CEBU, Philippines – Nagsugod na ang Division for the Welfare of the Urban Poor (DWUP) sa pagpahigayon sa clearing operation sa dapit nga naigo sa dakong sunog sa Barangay Duljo-Fatima aron makaimplementar na sila sa re-blocking scheme.
Sayo niining buwana ang operations chief sa DWUP Genevieve Alcoseba niawhag sa mga residente nga pwede nilang isalbar ang housing materials nga magamit pa sa dili pa moimplementar ang DWUP og total ground zero. Si Alcoseba nagkanayon nga gitinguhang mahuman ang clearing operations sa sunod semana aron makapadayon sila sa pag-survey sa home lots.
Ang team nagsugod sa operation sa niaging semana human ang mga apektadong residente nihatag kanila og pagtugot labot sa re-blocking plan.
Matud ni Alcoseba nga ang pag-survey sa mga apektadong home lots makatabang pag-identify sa gidaghanon sa mga estraktura diha sa luna nga gipanag-iya sa siyudad ug sa pribado.
Ang survey giingong molanat kini sa walo ngadto sa napulo ka adlaw ug inig kahuman niini magsugod sila sa embankment sa mga apektadong lugar.
Human sa maong proseso ang mga nasunogan mahimo na nga makatukod og balik sa ilang mga balay nga mosunod sa subdivision plan sa siyudad.
Ang pagpatuman sa re-blocking scheme nagpasabot nga mo obserbar sila og 6.5 meters nga distansiya sa karsada ug pathways nga tulo ka metros ang gilapdon.
Kahinumduman nga niadtong December 25, 2018 naigo sa sunog ang pito ka sitio sa Barangay Duljo Fatima nga gilangkuban sa Buli, Mansinitas, Catwalk, San Pedro, Plastikan, Pasong Kabayo ug Punyang diin dul-an sa 400 ka panimalay ang naugdaw ug 659 ka pamilya ang naapektohan. (/BDB)(BANAT NEWS)
- Latest
