CEBU, Philippines — Gihimug-atan sa City Environment and Natural Resources CENRO sa Dakbayan sa Toledo nga ilaha nang gihatagan og inisiyal nga solusyon ang problema kalabot sa hugaw nga inagos sa tubig gikan sa sanitary landfill sa siyudad.
Ang maong landfill nahimutang sa Barangay Putingbato bukiran nga bahin sa nahisgutang siyudad.
Ang maong problema naabot na kini diha sa Barangay Canlumampao diin ang mga tinubdan sa tubig naapektohan na sa itom nga inagos nga tubig gikan sa basura.
Matud ni Engineer Pilar Canga, officer-in-charge sa CENRO nga nadawat sa iyang opisina ang maong reklamo niadtong Enero 8, 2019 sa alas 2:00 sa hapon.
Human sa maong report pagkasunod adlaw ilang gibisita ang Barangay Canlumampao diin nipahigayon sila og tigom aron matuki ang maong problema.
Ang mga mag-uuma ug pipila ka mga residente sa barangay Canlumampao ang nitambong sa maong tigom.
Ang mga mag-uuma giingong nakasinati og katol sa panit panahon nga moubog sila sa kontaminadong tubig sa ilang humayan.
Matud ni Canga nga nagbutang sila og bio-enzyme nga kemikal diin makatabang kini nga mamatay ang kagaw ug mawala ang baho sa basura. Ang siyudad adunay P3 milyones nga gigahin nga pundo alang sa pagpaayo sa maong landfill.
Gipaabot usab ang pagpahigayon og bidding alang sa kontraktor nga mohimo sa pag-ayo sa ”leachate” diin kini maoy mosala sa inagos sa tubig gikan sa basurahan.
Ipailawom kini sa treatment aron ang mapagawas nga tubig dili na delikado sa mga tinubdan sa tubig.
Nagpaabot usab si Canga nga mahatag na ang iyang gihangyo nga dagko nga plastic container gikan sa usa ka pribado nga kompaniya sa siyudad nga magamit usab nga mosala sa inagos nga tubig gikan sa landfill. (BANAT NEWS)