CEBU, Philippines — Patay ang kanhi binilanggo gumikan sa kaso nga adunay kalambigit sa ilegal nga drugas dihang kalit lang gipusil sa wala hiilhing mamumuno sa Sitio Bangkerohan, Brgy. Tayud sa Lungsod sa Consolacion, pasado alas singko sa hapon niadtong miaging adlaw.
Si PO2 Jose Aaron Ortega sa Consolacion Police Station miila sa biktima nga si Arnold Salarsa, hingkod ang panuigon, nagpuyo sa naasoy nga dapit.
Matud pa ni PO2 Ortega nga nagbarog lang ang biktima dihang kalit nga mitumaw ang mamumuno ug namusil. Human kini mamusil, dali usab kining mipahilayo sa dapit ug ang biktima nga nagkadugo, gihatod sa mga tawo sa Eversely Child Sanitarium General Hospital sa Brgy. Jagobiao, Dakbayan sa Mandaue apan gideklarar kini sa mga doktor nga dead on arrival.
Ang polis miingon nga nadakpan na nila kaniadto si Salarsa gumikan sa paghupot og ilegal nga drugas pipila na ka tuig ug nabilanggo human nakonbikto sa kaso nga giatubang.
Dugang ni Ortega nga niadtong Disyembre 2018 lang nakagawas sa prisohan ang biktima.
Samtang grabeng naangol ang 30-anyos nga lalaki nga biktima sa pagpamusil pasado alas otso sa gabii niadtong Biyernes sa Sitio Eskuwelahan, Brgy. Basak, Dakbayan sa Lapu-Lapu. Giila ni PCInsp. Juan Capacio, hepe sa Presinto 4 sa Lapu-Lapu City Police Office ang biktima nga si Marwen Pacquiao Herasmo, ulitawo, taga Purok Kapayas, sa nahisgutang barangay. Matud ni Capacio nga pipila sa mga nakamatikod sa hitabo, miingon nga nakadagan pa ang biktima ug gigukod kini sa mamumuno.
Ang mga kabanay sa biktima maoy midala niini sa Lapu-Lapu City District Hospital apan gibalhin kini sa Vicente Sotto Memorial Medical Center sa Dakbayan sa Sugbo.
Dugang sa polis nga dili pa nila matataw ang tinuod nga hinungdan sa maong pagpamusil ug pag-ila sa mamumuno sanglit mohimo pa sila og dugang pagsukitsukit sa biktima nga kasamtangan karong gipaubos sa operasyon tungod sa samad pinusilan nga naangkon sa iyang tiyan. (BANAT NEWS)