40 ka priso sa CPDRC nataptan og tipdas

CEBU, Philippines — Nikabat sa 40 ka priso sa Cebu Provincial Detention and Rehabilitation Center (CPDRC) ang nataptan og tipdas matud sa Provincial Health Office (PHO).

Si Dr. Rene Catan, pangulo sa PHO nagkanayon nga posibleng moabot ngadto sa 50 ang mga naapektohan.

Gitataw ni Catan nga mga “mild cases” lang sa tipdas ang nasinati sa mga piniriso ug unang nabantayan ang pagkatap sa maong sakit diha sa prisohan niadtong niaging semana.

Si Catan nipadayag nga nakurat siya sa maong hitabo tungod kay dili kumon sa mga dagkong tawo ang tipdas sanglit sakit kini sa mga bata.

Matud ni Catan nga ang maong daling pagkuyanap sa tipdas diha sa CPDRC matawag kini nga epidemic.

Ang mga piniriso nga nataptan gilahi kini aron dili makatakod sa uban tungod kay ang tipdas usa ka communicable disease.

Matud usab ni Catan nga nakontrolar na ang maong sitwasyon sulod sa prisohan.

Ang mga piniriso nga gidudahang adunay tipdas apan wala pa nakompirmar ang padayong gi-monitor sa in-house nga clinic.

Ang warden sa CPDRC Reynaldo Valmoria nibutyag nga upat sa mga nasakit gidala na ngadto sa Vicente Sotto Memorial Medical Center (VSMMC).

Sa pagkakaron, ang CPDRC aduna kini 3,497 ka piniriso. (Lorraine Mitzi A. Ambrad/BDB)

Mandaue nipaimbestigar kalabot sa medical waste

Mopahigayon og buwag nga imbestigasyon ang kagamhanan  sa Dakbayan  sa Mandaue  kabahin sa medical waste nga gidagsa diha sa kabaybayonan sa Barangay Mactan, Barangay Ibo ug Barangay Poblacion sa Dakbayan sa  Lapu-Lapu.

Si Mayor Luigi Quisumbing niluwat na og kamandoan ngadto sa City Environment and  Natural Resources  Office (CENRO) sa pagsusi sa mga tambalanan nga nahimutang sa dakbayan ug mokuha og mga kasayuran labot sa pamaagi sa paglabay sa ilang mga basura.

Si Quisumbing nagkanayon nga mopahamtang usab siya og silot kon mapamatud-an nga nakahimo og kalapasan ang mga pribado nga tambalanan.

Ang usa sa mga tambalanan nga giingong gikan kanila ang ubang mga basura namahayag nga ilang gipatuman ang mga pamaagi sa paglabay sa ilang mga basura ug gipaniguro nila kini sa publiko.

Subay niini, nunot sa pagkadiskubre sa maong matang sa mga basura gilusad dayon sa kagamhanan sa Dakbayan sa Lapu-Lapu ang ilang kinaugalingong imbestigasyon.  BDB (BANAT NEWS)