CEBU, Philippines — Gitanggong na karon ang pito ka giilang pusher human sa managlahing police station nunot gipasiugdahang Simultaneous Enhanc-ement Management Operation (SEMPO) sa kapolisan sa Lungsod sa Liloan ug San Remigio.
Giila ni PCInsp. Jose Angelo Acupinpin, hepe sa Liloan Police Station ang ilang nadakpan nga si Jesserell Enriquez ug Orlan Batucan. Matud ni Acupinpin nga nasakmit nila gikan sa duha ang upat ka medium sized nga pakete sa gituohang shabu ug ingon man ang giluwanan nila nga color gray nga Toyota Vios.
Nadakpan usab sa kapolisan sa Lungsod sa San Remigio sa Sitio Suso, Brgy. Luyang sila si Roderick Kapalac, Rick Marianito, Bambino Reyes ug Diosdado Eballe nga pulos nagpuyo sa maong dapit. Laing nadakpan mao si Johnny Resellosa nga taga Sitio Kayam, Brgy. Maño sa maong lungsod.
Sa kinatibuk-an, ilang nasakmit ang upat ka gagmayng pakete sa gidudahang shabu, P500 nga buy bust money ug laing P500 nga gituohang halin nila. Matud sa hepe sa San Remigio Police nga si PCInsp. William Humoc nga mag-atubang og kasong kalapasan sa Republic Act 9165 o Comprehensive Dangerous Drug Act of 2002 ang mga dinakpan. (BANAT NEWS)