Dili sigurado nga walay mamatay

CEBU, Philippines — Ang hepe sa Cebu City Police Office nga si Police Senior Supt. Royina Garma nagkanayon nga mas daghan ang ilang himuong operasyon kontra ilegal karong tuig 2019, apan walay kasiguradohang ma menosan o walay mamatay sa mao unyang mga operasyon.

“Hindi kami ang magsabi na ma-lessen. We have to warn the criminals not to fight back, wala sa kamay ng polis ang sitwasyon na ma-lessen ang mamatay,” si Garma nagkanayon.

Padayong gipasabot ni Garma nga kon aduna man gani hulga sa kinabuhi sa polis, ang pagprotekta sa ilang kaugalingon ang ilang unahon.

“Ours will always instinct na to defend ourself in a way na we will be able to preserve yung lives namin, lives of the suspects and ng mga properties sa area, We will train ourself na kami ang mauna palagi,” sigon sa direktor.

Pasalig niya nga ipatigbabaw gihapon ang tawhanong katungod sa mga suspetsado.

Sa datos nga ilang gihatag, onse kabuok ang namatay atol sa anti-drug operations sugod sa unang adlaw sa 2018 hangtud sa Disyembre 31, 2018, diin lima niini ang user ug unom ang pusher.

Sa laing bahin, nanghinaut ang direktor sa Commission on Human Rights nga si Attorney Leo Odron nga unta dili abusaran sa mga polis ang gihatag nila nga suporta ug pagsalig sa ilang labaw.

“Ilang thinking, ‘mopatay gyud na og polis’ kung mao na ang thinking sa mga suspect it’s because they are criminals. But kamo police di man mo criminal, so do not use the argument of the criminals nga mopatay,” si Odron nagkanayon.

Apan nasabtan hinuon ni Odron nga aduna gyuy mga higayon nga mabutang sa peligro nga sitwasyon ang kinabuhi sa mga polis.

“If nay eminent threat sa life sa police operative, they have to use firearm but that should not be equated as a license to kill. Ang paggamit sa firearm is to subdue or to neutralize ang suspect, if na-neutralize na siya then perform your duty to arrest him,” matud ni Odron. “Sa mga suspek sad, naa sad nay uliang pamilya ang mga polis intawon,” dugang niini.

Sa laing bahin, planong mas hingusgan pa ang mga operasyon kontra ilegal nga sugal. Base sa ilang datos, miabot sa 1,033 ka operasyon ang gihimo sa CCPO sugod Enero 1, 2018 hangtud sa katapusang adlaw sa Disyembre 2018. Diin 2,114 kabuok ang nadakpan.

Samtang sa operasyon kontra ilegal nga drugas, 2,564 ka mga operasyon ang ilang gilusad sa miaging 2018 ug buot ni Garma nga malabwan kini karong tuiga. (/DILT)(BANATNEWS)