CEBU, Philippines — Ang Cebu Provincial Police Office (CPPO) nibutyag nga diyotay lang ang mga insidente nga nahitabo sa pagsugat sa pasko ug bag-ong tuig ikompara sa nilabay’ng tuig sa 2017 kini tungod sa hugot nga kampaniya sa kapolisan batok sa paggamit sa ginadili nga pabuto.
Sa talaan sa CPPO aduna lang kini pito ka firecracker incidents nga natala karong tuiga samtang sa nilabay’ng tuig adunay 15 ug 2 ang stray bullet injuries.
Samtang sa talaan sa Department of Health (DOH) mas taas karon og 11 porsiyento ang gidaghanon sa mga nabuthan ikomparar sa nilabay’ng tuig.
Base sa talaan sa DOH nga 60 ka tawo ang natala nga naangol tungod sa pabuto nga nadala diha sa mga pribado ug publikong tambalanan.
Ang mga naangol 50 niini ang gikan sa Cebu Province; unom sa Bohol; lima sa Negros Oriental; usa sa Siquijor ug duha ka pasyente ang adunay duha ka classifications.
Ang mga nabuthan naglangkub sa upat ka blast/ burn with Amputation o naputlan og parti sa lawas; 43 ka blast/burn without Amputation; siyam ang eye Injury; dunay laing duha ug upat ang naigo sa saag nga bala.
Sa mga nabuthan 40 niini mga lalaki, 20 kabuok babaye nga nagpangidaron gikan sa 2-anyos ngadto sa 63-anyos.
Ang mga pabuto nga gigamit sa nabuthan naglangkub sa kwitis, Piccolo, triangle, Judas belt, hotdog, lebentador diin 21 niini ang active ug 39 ang passive ug 35 ang nahitabo sa dalan ug 25 sa panimalay ug walo ang ubos sa ilimnon nga makahubog.
Gibutyag ni Dr. Shelbay Blanco, pangulo sa health emergency management nga ang naigo sa saag nga bala gikan sa Dakbayan sa Talisay.
Sa talaan sa Talisay City Police Station si Joel Resuento, 30-anyos, ulitawo ang nalandig diha sa Talisay City District Hospital human naigo sa saag nga bala diha sa Sitio Mananga 2, Barangay Tabunok niadtong Martes sa kadlawon.
Sa laing bahin, nikabat ngadto sa P154,519 ang balor sa mga nasakmit nga pabuto ug pyrotechnics sa tibuok Dakbayan sa Sugbo pipila ka oras una ang pagsugat sa bag-ong tuig.
Matud sa direktor sa Cebu City Police Office (CCPO) Police Senior Superintendent Royina Garma nga ang maong mga nakompiska gikan sa mga namaligya diha sa gawas sa lugar nga gitagana.
Adunay 26 kabuok ang nadakpan kinsa namaligya diha sa tukmang lugar.
Samtang sa Dakbayan sa Lapu-Lapu 10 ka tawo ang natala nga biktima sa pabuto ug upat usab ang natala sa Dakbayan sa Mandaue sa pagsugat sa bag-ong tuig.
Sa laing bahin usab, gihulagway nila ni Konsehal Dave Tumulak, chairman sa committee on public order and safety ug pangulo sa Cebu City Disaster Risk Reduction and Management Office (CCDRRMO) Nagiel Bañacia nga malinawon ang pagsugat sa bag-ong tuig.
Apan aduna sila’y gialarmahan nga mga vehicular incident nga nahitabo atol gyud sa bag-ong tuig diin adunay nag-party diha sa daplin sa karsada ug gibabag sa karsada ang metal railings ug adunay motorsiklo ang nadasmag ug uban pang sakyanan. (Camille L. Pateres, Romeo T. Limpangog ug Decemay P. Padilla/BDB)(BANATNEWS)