3,003 ka barangay sa CV ipaubos sa orientation

CEBU, Philippines — Ang 3,003 ka barangay sa Central Visayas pauswagon ang ilang kahibawo kabahin sa good governance alang sa kalamboan sa ilang barangay sa paghatag og maayong serbisyo sa ilang mga konstituwente.

Base sa regional plan sa Department of Interior and Local Government ( DILG) sa sunod tuig nga i-prioritize ang pagpalambo sa good governance, kahusay ug kalinaw, social protection, lokal nga ekonomiya ug environment climate change adaptation (CCA) ug disaster risk reduction (DRR).

Si Michael Braga, information officer sa DILG-7 nagkanayon nga adunay capacity development activities nga mag-edukar sa mga opisyal sa barangay pagpauswag sa ilang mga nakat-onan alang sa hapsay ug epektibo ang paghatag sa serbisyo ngadto sa katawhan. Matud ni Braga nga sa maong programa makabenepisyo niini ang kabarangayan diin ma-capacitate ang naa sa ubos nga level.

Ang gitinguha sa tuig 2019 ubos sa good governance mao ang pagpauswag sa planning ug budgeting sa local government unit (LGU). Kabahin sa kahusay ug kalinaw ipahigayon ang capacity development for admin sa Barangay Peace and Order Committee (BPOC).

Sa social protection mao ang pagbansay sa Barangay Council for the Protection of Children (BCPC) ug Local Committee on Anti- Trafficking and Violence against Women and their Children (LCAT-VAWC).

Samtang sa local economic development orientation sa LGU mao ang pagsulbad sa problema sa mga informal settler ug sa environment, CCA, DRR diin ipahigayon ang retooling sa LGUs sa disaster preparedness. (/BDB)(BANATNEWS)