CEBU, Philippines – Ang kadto lang dunay permit nga manindahay og mga pabuto ang gitugotan sa kagamhanan sa Dakbayan sa Lapu-Lapu, kabomberohan ug kapolisan nga makabaligya sa ilang produkto diha sa fire cracker zone sa Barangay Babag ug Canjulao.
Ang mga walay permit nga nagtago-tago sa pagpaninda sikopon kini kong masakpan sa mga polis nga magpatrolya sa lugar.
Ang hepe sa Lapu-Lapu City Police Office (LLCPO), Senior Superintendent Lemuel Obon ang nakaluwat na og kamandoan ngadto sa iyang mga sakop sa pagsikop sa mga nagtago-tago og pamaligya og pabuto ug pagsakmit sa mga gibaligya niini.
Nagsugod na sa pagpamaligya sa ilang mga pabuto ang adunay mga permit niadtong Domingo, Disyembre 16 ug hangtud lamang kini sa Disyembre 31 sa dili pa ang tungang gabii.
Ang pipila ka mga negosyante og paboto sa Barangay Babag sa maong dakbayan nga nahinabi sa Banat News nipadayag nga dako og epekto kanila ang kampaniya sa kagamhanan batok sa paggamit og pabuto sa pagsugat sa pasko ug bag-ong tuig.
Matud sa maong mga negosyante nga hinay ang ilang halin tungod kay tagsa na lang ang mamalit og pabuto dili sama sa nangaging katuigan nga sa bulan pa lang Nobiyembre kusog na kaayo ang ilang halin. (/BDB)(BANAT NEWS)