CEBU, Philippines – Usa ka lalaking drug surrenderee ug usa ka babaye nga tigpautang ang gipamusil sa managlahing higayon sa Barangay Guadalupe ug Barangay Kalunasan, Cebu City niadtong Domingo sa gabii. Ang biktima nailhan nga si Letecia Dosdos, taga Foresthill Drive, Banawa, Barangay Guadalupe ug nagpuyo kini kauban sa iyang igsoun sa maong lugar.
Base sa inisyal nga imbestigasyon sa kapolisan ang biktima nisakay sa usa ka habal-habal apan sa dihang padung na kini mosulod sa iyahang tugkaran gipusil kini sa wa mailhing tawo nga nagsakay usab og motorsiklo.
“Ang estorya sa iyang igsoun gikan to siya nisimba, padung ‘to mopauli sa ilaha, pagsulod sa gate kalit lang nga miabot ang suspect ug gipusil siya kausa naigo siya sa may liog,” matud ni Police Senior Inspector Dexter Basirgo, hepe sa Police Station 9. Base sa nakuhang impormasyon sa kapolisan gikan sa igsoun sa biktima nagpautang kini og kwarta ug ubay ubay na sab ang mga gipaninglan niini.
“Nagpautang siya unya naa pud siya’y giutangan. Nakuha pud ang iyahang notebook-lista ug naay figure amount nga paninglunon o bayranan ba kaha to, so mao ni karun among gisubay, tungod anang notebook nga nakuha sa biktima og masubay nato, kung kinsa gyud ang namuno adto,” dugang pa ni PSI Basirgo. Ang biktima napusilan kini sa liog og gidala kini sa pribadong tambalanan.
Sa laing bahin, gipusil sab ang usa ka Dexter Pitur, 28, diha sa Sitio Kamanggahan, Barangay Kalunasan.
Si Pitur nag-abang sa maong dapit ug usa kini ka tattoo artist ug drug surrenderee sa Guadalupe Police Station.
“Wala kaayo nakaila man niya didto, kay dili man to taga didto nag-abang ra na siya didto, unya base sa among records nangita mi sa real identity, sa pagtan-aw namo sa records usa siya ka drug surrenderee sa atong programa before sa Oplan Tokhang sa Guadalupe,” matud ni Basirgo.
Ang biktima nalandig sa tambalanan ug padayon pa ang kapolisan sa paghimo og imbestigasyon bahin sa duha ka pagpamusil sa maong barangay. (Nichole Alexis A. Abas/IBM)(BANAT NEWS)