CEBU, Philippines — Moluwat sa pagka-konsehal sa Siyudad sa Sugbo ug isip kandidato pagka-Konsehal ubos sa Partido Barug PDP Laban sa South District si Erik Miguel Espina.
Si Espina miingon nga ang iyang pagluwat sa katungdanan gitumong aron mapadali ang pagbalik ni James Cuenco nga maoy iyang gihulipan sa katungdanan dihang gitangtang kini sa serbisyo tungod sa kasong serious dishonesty ug grave misconduct.
Apan midaug ang kaso ni Cuenco dihang giapelar sa Court of Appeals ang desisyon sa Ombudsman.
Matud ni Espina nga aduna sila’y kasabutan ni Cuenco nga mokanaog siya kon duna nay kamanduan ang DILG pagbakante sa pwesto.
Si Espina nga anak sa kanhi senador ug kanhi gobernador Rene Espina miingon nga dili siya gusto nga madudahan nga maoy nakalangan sa pagbalik ni Cuenco sa katungdanan.
“Such move must be understood as to provide the widest latitude for honorable Cuenco to be able to return with haste, granting various options before he bows out of politics five months, unimpeded by my continued incumbency in the City Council”, matud ni Espina.
Gipadayag usab niini nga andam usab siyang mobiya isip kandidato pagka-konsehal aron makapili og laing ipuli kaniya ang ilang partido.
Gipasalig niya nga padayon ang iyang suporta sa ilang grupo ug ingon man ang pagserbisyo sa katawhan bisan di na siya konsehal.
Gani padayon ang iyang pag-apod-apod sa Malasakit card alang sa mga kabus nga maglisod sa pagbayad sa gastuhan sa tambalanan.
Si Espina mipuli ni Cuenco human gitudlo siya mismo ni Presidente Rodrigo Duterte.
Samtang si Vice Mayor Edgardo Labella nga kaalyado ni Espina miingon nga dihang gitudlo ang konsehal sa presidente matud pa adunay ‘gentleman’s agreement’ tali sa duha.
“… maybe Erik Espina is expecting by the end or anytime this month the order from DILG would already be released”, sigon ni Labella. Dugang ni Labella nga makig-istorya pa siya ni Espina. (/DILT)(BANATNEWS)