CEBU, Philippines — Ang usa ka haligi sa 8.5-kilometer Cebu-Cordova Link Expressway (CCLEX) ang tukoron ug makaigo sa luna nga gipanag-iya sa kagamhanan sa Siyudad sa Sugbo sa may Barangay Ermita. Hinuon, dili kini makaigo og residential area ug walay maapektuhan nga mga residente.
Matud ni executive assistant Francisco Fernandez nga adunay responsibilidad ang siyudad nga tabangan ang Cebu-Cordova Link Expressway Corporation (CCLEC) nga dili maglisod og gamit og public lands aron makumpleto ang maong proyekto.
Gamiton sa CCLEC ang 751-square meters sa luna sa siyudad nga adunay total lot area nga 3,039 square meters sa may Lot 4, Block 31 sa Brgy. Ermita. Diin sa kasamtangan, adunay multi-purpose building sa maong lugar.
Gibutyag ni Fernandez nga magtukod ang siyudad og laing building sa laing lugar aron mahuman ang taytayan nga magsumpay sa Cordova ug Cebu City.
Giaprubahan na sa City Council ang resolusyon nga naghatag og awtoridad ni Mayor Tomas Osmeña nga mopirma sa Deed of Usufruct pabor sa CCLEC.
“Under Section 7.1.2 of the Concession Agreement, the City of Cebu and the Municipality of Cordova shall be responsible for providing the right of way on public lands respectively owned them, including all incidental costs required for the removal and clearing of structures and the resettlement of occupants,” tipik sa Deed of Usufruct nga giaprubahan sa Konseho.
Gisugdan na ang civil works sa third bridge karong tuiga ug gilauman nga mahuman kini sa tuig 2021. (/DILT)(BANATNEWS)