Skate park sugdan na og trabaho

CEBU, Philippines – Gilauman nga sa buwan sa Pebrero sunod tuig aduna nay lugar ang mga mahiligon sa skateboarding nga dili na sila sitahon o badlungon kay nakabalda sa trapiko ug delikado sa disgrasya.

Gipaabot nga sunod semana, sugdan na ang konstruksiyon sa Cebu City Skate Park sa may dalan A. Pigafetta, sa likod nga bahin sa Fort San Pedro. Ang maong luna gipanag-iya sa Cebu City government nga adunay gidak-on nga 4,000 square meters.

Si Maria Victoria “Minnie” Osmeña, igsuon ni Mayor Tomas Osmeña ang mihatag og P5 milyones alang sa katukuran sa maong skate park.

Kagahapon sa buntag gipahigayon ang pagpinirmahay sa MOA, ground breaking ug laying of time capsule alang sa maong skate park.

Si Minnie nagkanayon nga mi-donate siya alang sa maong proyekto kay gawas nga duol niya ang katawhan sa Sugbo, gusto usab niya nga mahatagan og lugar ang mga kabataan nga dili lang maghatag og kalipay ingon man pagpalambo sa ilang hilig sa maong sports. Usa sa nalipay sa maong kalambuan mao si Asian Games Gold Medalist Margielyn Didal. Sigon niini nga mahinungdanon kaayo kini alang kaniya kay aduna na gyud sila’y lugar.

Ang skatepark libre nga magamit ug aduna pay mga himoon aron kini mas molambo.

“Pasalamat mi… ug gihatagan ninyo og lugar para makaduwa para dili nami sitahon sa kadalanan”, matud ni Didal kinsa gikatakdang molarga paingon sa Brazil aron mosalmot sa Street League Finals.

Si Mayor Osmeña mipasabot sab nganong gipa-donate niya ang iyang igsuon, kini aron wala na’y taas nga proseso sa gobyerno.

Samtang si Konsehal Eugenio Gabuya Jr., tsirman sa Committee on Games, Amusement and Sports miasoy nga andam na ang Program of Works and Estimates sa maong proyekto.

Ang kuwang nga pundo alang sa maong proyekto ila na sab nga gitrabaho. -/DILT (BANAT NEWS)