CEBU, Philippines — Andam na ang tanang hingtungdang ahensiya sa pagmentinar sa kahapsay ug kalinaw sa umaabot nga selebrasyon sa Pasko ug Sinulog Festival.
Si Konsehal Dave Tumulak, ang tsirman sa Committee on Public Order and Safety ug Deputy Mayor for Police Matters sa Siyudad sa Sugbo miingon nga ang nagkalaing-laing ahensiya hugot nga nag-monitor sa dakbayan karon.
Ang maong buhatan naglangkob sa Philippine National Police, Armed Forces of the Philippines, Cebu City Transportation Office, Cebu City Disaster Risk Reduction Mangement Office, ug uban pa. Gituki nila ang maong kalambuan sa ilang panagtapok niadtong Sabado aron sa pagsiguro nga han-ay na ang security measures sa Pasko ug Sinulog Festival.
Apan dili hinoon makabutyag ang konsehal kun unsa nga mga pamaagi ang ipatuman.
Gipasalig niya sa publiko nga ang mga tinugyanan sa balaud nag-monitor sa pampublikong lugar sama malls, terminals, pantalan ug uban pa.
Gilauman nga karong nagkaduol na ang Pasko ug Bag-ong Tuig, modagsa ang bagang duot sa katawhan sa pampublikong lugar alang sa nagkalain-laing kalihukan.
Gipaabot sab nga mobisita ang mga langyaw ug lokal nga turista nga gustong mosaksi sa Sinulog Festival nga ipahigayon matag tuig, kada ikatulong Domingo sa buwan sa Enero. (BANAT NEWS)