Bolunterismo, panerbisyong way bayad-Bong Go

CEBU, Philippines — Gidayeg ni Christopher “Kuya Bong” Go ang mga tawong nagpabilin sa kasingkasing ang diwa sa bolunterismo atol sa iyang pamahayag isip pinasidunggang dinapit sa Vice Mayor Joy Belmonte Volunteer Movement and Gift Giving didto sa buhatan ni Rep. Sonny Belmonte sa Quezon City niadtong adlaw nga Sabado.

Matud pa ni Go ang bolunterismo usa ka hiyas sa usa ka tawo. Sila kadtong mga tawong andam motabang o motagana og panahon nga walay pangayoong bayad.

Tungod niini, gipasalamatan ni Go si Vice Mayor Joy Belmonte tungod kay ang programang gitukod niini nakadasig sa katilingban nga mamahimong matinabangon sa uban. Tungod niini gidayeg ni Go si Belmonte sa iyang inisyatiba nga paghatag og pahalipay niadtong mga niboluntaryo pagtabang bisan wala nila kini pangayoa.

Si Go kinsa mokandidato pagka senador sa mid-term elections nakigestorya usab kang Belmonte kabahin sa kamahinungdanon sa papel sa Malasakit Center ngadto sa mga kabus.

Ang Malasakit Center usa ka one-stop shop nga diin giusa ang tanang ahensya sa gobiyerno nga mahimong makatabang sa galastohan sa pagpatambal sa mga kabus nga pasyente pinaagi sa pinansiyal nga tabang nilang mahatag.

Kun siya palaron ug mahatagan og mandato isip senador, gusto ni Go nga ipasubay ug tun-an pagbalik ang kasamtangang Universal Healthcare Bill, Government Procurement Law, Juvenile Justice Law at Continuing Professional Development Law, aron mas mapalapdan pa ang kapuslanan niini pinaagi sa posibleng pag-amendar niining mga balaora.

Dugang gitinuha ni Go ang pagpatukod og daghang sports and youth development centers, housing projects, pagtukod og Department of OFWs aron matutokan ang panginahanglan ug mga yangungo sa mga OFWs ug ang pagpahigayon og mga localized peace talks.

Subli usab niyang gipanawagan ang katawhan nga suportahan ang 3-point program ni Presidente Rodrigo Duterte batok sa illegal drugs, kriminalidad ug korupsyon. (BANAT NEWS)