Mga grupo sa fraternity sa Toledo gi-seminar

CEBU, Philippines — Gipailawom sa leadership seminar ang pipila ka mga sakop sa nagkadaiyang grupo sa fraternity sa Dakbayan sa Toledo niadtong Biyernes.

Ang maong leadership seminar gitambongan sa mga miyembro sa Alpha Sigma Omega, Apha Sigma NU, Beta Phi Sigma, Fox Theta Delta, Pigamma Phi, Scout Royal Brotherhood, Tau Gamma Phi, Upsilon Phi Sigma, Zheta Phi Sigma ug Alpha Kappa Rho nga pulos nagbase sa Siyudad sa Toledo.

Ang maong seminar gipasiugdahan kini sa acting nga hepe sa Toledo City Police Station Police Superintendent Randy Korret. Ang police community relation officer sa kapolisan sa siyudad Senior Police Officer 1 Dante Hilo ang nagsilbing speaker sa maong tigom. Si Hilo nipahimangno sa mga miyembro sa fraternity sa paglikay sa ilegal nga drugas, pagtinil og armas ug paglikay sa pagmugna og kagubot.

Samtang si Police Officer 3 Carlos Barluado ang nipasabot usab sa mga sakop sa fraternity kabahin sa “Republic Act 11503 amends Republic Act 8049” kun “Anti-hazing Law” diin ang maong balaod posibleng malapas atol sa pagpahigayon og initiation rites sama sa pagpangdagmal, pagbinastos, pagpatay ug pagpanglugos.

Tumong sa kapolisan sa Dakbayan sa Toledo nga magkahiusa ang mga nagkadaiyang grupo sa fraternity sa siyudad og dili magmugna og kagubot. (/BDB)(BANATNEWS)