CEBU, Philippines – Moabot ngadto sa 290 ka dakop ang nahimo sa Provincial Environment and Natural Resources Office (PENRO) sulod sa 10 ka bulan niining tuiga. Matud ni Jason Lozano, pangulo sa PENRO nga ang maong dakop gilangkuban kini sa ilang operasyon sa coastal law enforcement sama sa pagsikop sa ilegal nga pagpanagat ug pagkasakmit sa mga isda nga gidili kuhaon.
Gibutyag ni Lozano nga 33 ka kasong kriminal ang ilang napasaka batok sa ilang mga dinakpan. Sa laing bahin, gawas sa ilegal nga panagat nagpahigayon usab ang PENRO og operasyon batok sa ilegal nga pangubkub og bas ug graba ug overloading ang karga. Ang PENRO adunay nadakpan nga nag-overloading og karga sa graba ug bas ug walay sticker sa probinsiya.
Nabantayan sa PENRO nga kasagaran sa ilang mga nadakpan mohimo og palusot atol sa gabii, kaadlawon o weekend hinungdan nga mohimo usab sila sa ilang operasyon nianang mga higayona.
Sa maong operasyon sa PENRO adunay nakolekta nga P28.8 milyones lakip na niini ang nakolektang buhis sukad niadtong buwan sa Enero hangtud sa Oktubre niining tuiga. (/BDB)(BANAT NEWS)