Duha ka most wanted sikop
CEBU, Philippines – Duha ka most wanted persons sa Lungsod sa Daanbantayan ug Barangay Labangon, Dakbayan sa Sugbo ang nasikop sa kapolisan kagahapon diha sa Toledo City Jail ug Barangay Punta Engaño, Dakbayan sa Lapu-Lapu.
Si Wilfredo Paredes alyas "Amboy", 47, napriso diha sa Toledo City Jail tungod sa kaso sa ilegal nga drugas ug ilegal nga paghupot og armas ang mobutang unta og piyansa alang sa iyang temporaryong kagawasan apan gi-served kaniya ang warrant of arrest sa kasong homicide gahapon sa alas 10:30 sa buntag hinungdan nga nagtingkagol kini og balik sa prisohan.
Giingong si Paredes wanted kini sa kasong homicide diha sa Barangay Labangon, Dakbayan sa Sugbo ug taud-taud na kining nagtago-tago diha sa iyang paryente sa Dakbayan sa Toledo.
Sa laing bahin, nasikop usab niadtong Martes sa gabii ang most wanted sa Daanbantayan diha sa Barangay Punta Engaño, Lapu Lapu.
Ang suspetsado mao si Jason Arribado, 29, lumad nga taga Sitio Hubot, Barangay Talisay, Daanbantayan nag-atubang og kasong attempted murder.
Matud ni SPO3 Mamerto Gastador, chief intelligence sa Daanbantayan Police Station nga nakadawat sila og report kabahin sa nahimutangan ni Arribado diin nagtrabaho kini diha sa usa ka construction site sa Barangay Punta Engaño. -/BDB (BANAT NEWS)
- Latest
