Northbound lane sa N. Bacalso bukas na
CEBU, Philippines — Ang mga sumasakay ug motorista mahuwasan na unya sa kahuot sa dagan sa trapiko sa South District human ang Cebu City Transportation Office(CCTO) miabli sa southbound ug northbound side roads sa underpass project diha sa Natalio Bacalso Avenue.
Alas 10:30 kagahapon sa buntag ang duha ka side roads gibuksan na human ang kontraktor sa proyekto nga WT Construction Inc. nakakompleto sa pagtrabaho sa dalan.
Ang operations chief sa CCTO Francisco Ouano miingon ang road concreting sa northbound side road nakompleto niadtong adlaw’ng Sabado.
Sa maong adlaw, nag-ocular inspection ang CCTO ug nakita nga mahimo na kining paagian sa mga sakyanan.
Buksan unta ang northbound side road niadtong Nobiyembre 24 apan gumikan sa bagyong Samuel gisibog kini kay nadelatar ang paghuman niini.
“Okay na ang dagan karon, naa ‘guroy pag-delay sa pag-move sa mga sakyanan during peak hours but dili na ingon grabe sama kaniadto,” pangagpas pa ni Ouano.
Ang peak hours magsugod gikan sa alas 6 hantod na sa alas 10 sa buntag ug alas 4 sa hapon hantod na sa alas 9 sa gabie.
Ang problema sa trapiko sa maong lugar nagsugod niadtong Agosto 2017 tungod sa pagtukod sa P638 million DPWH underpass project sa N. Bacalso Avenue.
Bisan abli na ang duha ka lanes, padayon gihapong abli ang diversion roads sa Caimito Street, Ganciang Street, F. Llamas Street ug uban pa.
Giklaro hinoon ni Ouano nga ang mga bus, mini bus ug delivery trucks adto lang gihapon sa Cebu South Coastal Road moagi.
Ang WT Construction Inc. nagtrabaho na sa Phase V ug VI sa proyekto nga mao ang tunga-tungang bahin sa underpass project. (BANAT NEWS)
- Latest
