‘Dancing fireworks’ sa Sinulog 2019
CEBU, Philippines — Alang sa sunod tuig nga Sinulog finale, ang Sinulog Foundation, Inc. nag-andam og grandiyusong fireworks display sa Cebu City Sports Complex.
Si Sinulog Executive Committee chairman Konsehal Dave Tumulak niingon nga mo-display sila og “dancing fireworks” aron pagtapos sa Sinulog Festival sa Enero 2019.
Sa matag selebrasyon sa Sinulog, ang fireworks display maoy usa sa gihuwat sa mga motan-aw sa kalihukan diin ang mga manan-away makakita og mga nagkalain-laing klase sa pyrotechnics.
Matud ni Tumulak nga ang SFI nitagana og P500,000 nga budget alang sa procurement sa fireworks diin mas taas kini og P100,000 itandi karong tuiga.
“Naa ta’y fireworks display, much bigger, this is dancing fireworks,” matud ni Tumulak.
Gawas sa mas taas nga budget sunod tuig, ang fireworks display sa CCSC modungan sab sa mga malls.
Matud ni Tumulak nga niumol sila sa maong ideya aron paghatag og lugar sa publiko sa pagtan-aw sa fireworks display.
“So katong mga tawo sa malls, stay put lang sila didto. Ang reason nato ani is ang pagbahin-bahin sa mga tawo,” matud sa konsehal.
Sa pagkutlo niining maong balita, duha ka iladong malls ang nikompirmar nga mosalmot.
Samtang wala pay ideya si Tumulak kun duna ba o wala bay signal jam atol sa selebrasyon.
Sukad niadtong 2017 gipatuman ang signal jam alang sa seguridad sa mga manan-away ug mga partisipante.
Lakip kini sa security measures nga gi-implementar sa mga hingtungdang ahensiya aron mamentinar ang kahapsay ug kalinaw sa Sinulog Festival. (BANAT NEWS)
- Latest
