Laing licensing center sa LTO gibuksan

CEBU, Philippines – Pormal na nga giablihan ang ikaduhang Land Transportation Office (LTO)-7 Mega Licensing Center diha sa Dakbayan sa Lapu-Lapu kagahapon.

Matud ni LTO-7 regional director Victor Caindec nga ang maong bag-ong Mega Licensing Center mo-process na kini og bag-ong lisensiya, renewal sa lisensiya ug student permit.

Nagkanayon si Caindec nga dili lang taga Dakbayan sa Lapu-Lapu ang i-cater sa maong licensing pwede ang taga laing lugar tungod kay konektado ang ilang network sa tibuok nasud.

Ang unang Mega Licensing Center sa Central Visayas nahimutang kini diha sa SM Seaside City Cebu.

Nunot niini, gibutyag ni Caindec nga mag-abli usab unya sila og duha ka temporary off-site printing offices sulod niining bulana diin tumong niini ang paspas ug hapsay nga serbisyo ngadto sa publiko.

Ang duha ka TOPOs anha ibutang sa city wing sa SM Seaside City ug Robinsons Galleria Cebu.

Matud usab ni Caindec nga sa pagkakaron adunay duha ka TOPOs sa region-7 nga naa nahimutang sa Bohol ug sea view wing sa SM Seaside City.

Ang opisina sa LTO sa Sante Fe sa Isla sa Bantayan moabli na usab  karong unang semana sa Disyembre niining tuiga.

Dugang ni Caindec nga ang maong opisina usa kini ka licensing center ug registration center diin moserbisyo kini sa mga aplikante dili lang gikan Santa Fe lakip na usab kadtong aplikante gikan sa Bantayan ug Madredijos. (/BDB)(BANAT NEWS)