CEBU, Philippines – Gisaway diha sa social media ang proyekto sa gobiyerno nga taytayan sa lungsod sa Sibonga tungod sa pasangil sa mga netizens nga "substandard" ang pagkahimo niini.
Usa ka Facebook user ang ni-post og daghang mga hulagway nga nagpakita sa bangag ug pagpangliki sa south-bound lane sa bag-ong gitukod nga taytayan sa Sitio Dumlog, Barangay Simala nga naa sa national highway. Ang nag-post miingon nga risgo ang maong mga depekto.
Gani usa sa mga hulagway nagpakita sa usa ka bahin niini nga diin "naampaw" ug nigimaw ang mga kabilya. Ang post miani og 214 reactions ug 603 ka shares alas-4 kagahapon sa hapon. Pipila sa mga komento sa mga netizens misaway sa gobiyerno tungod sa matud pa nila kurapsyon ug wala taronga pagmonitor ang mga proyekto.
Si Jonathan Tumulak, focal person on traffic management sa probinsya sa Sugbo miingon nga gisiradohan una ang south-bound lane ug giawhag ang ubang motorista nga molusot sa alternatibong agianan sa Simala Shrine or Monastery of the Holy Eucharist sa Sitio Lindogon ug adto mogawas sa Sitio Bagakay pabalik sa national highway.
Si Congressman Gerald Anthony Gullas, Jr. sa Cebu's First District diin masakop ang Sibonga nanawagan sa Department of Public Works and Highways paghimo og imbestigasyon bahin sa pasangil nga substandard ang pagkahimo sa taytayan. Si Konsehal Amado Lopez, konsehal sa Barangay Simala ug chairman sa Traffic Management sa barangay nga nakahinabi sa Banat News miingon nga ilahang bantayan ang taytayan aron di magka trapik. -/IBM (BANAT NEWS)