Kooperasyon tali sa Pilipinas ug China gipalig-on

CEBU, Philippines – Ang Pilipinas ug China nipagawas og 37 joint statements sa nagkalain-laing mga isyu nga ang duha parehong nagkauyon nga kinahanglang palambuon ug ipatuman karon nga maayo ang relasyon sa duha ka nasud.

Atol sa pagbisita ni Xi, gibalikan nilang duha ni Pres. Duterte ang kasaysayan sa panaghigalaay tali sa  duha ka nasud. Ilaha usab gituki ang direksyon nga taakon alang sa malungtarong kooperasyon ug kalamboan sa duha ka mga nasud.

Gituki usab nila ang kabahin sa regional ug international issues nga nakaapektar sa duha ka nasud. Parehong gidayeg sa duha ka lider ang usa’g-usa sa tagsatagsa nila mga kalamposan sa pagpangulo sa ilang mga nasud.

Matud pa sa duha ka lider magbunga og maayo para sa ilang mga nasud kining pagpalawom pa sa bilateral cooperation subay sa kaparehas nga interes ug pangandoy sa katawhan.

Aron magpadayon ang maayong relasyon giestablisar nilang duha ang Comprehensive Strategic Cooperation. Pareho usab nilang giuyonan nga mahinungdanon ang kasamtangang maayong relasyon ug dayalogo sama sa Foreign Ministry Consultations, Consular Consultations, Joint Commission on Economic and Trade Cooperation, Annual Defense Security Talks, Joint Committee on Agriculture, Joint Committee on Fisheries, and the Joint Commission Meeting on Science and Technology, ug uban pa aron mas molawom ug molig-on ang partnership sa duha ka nasud. Matud pa sa duha kinahanglang ipabilin ang close high-level communication bahin sa mga major regional ug international issues ug magbinayloay og mga kasinatian alang sa kaayohan sa tanan. Samtang subling gipadayag sa Pilipinas ang  pag-ila sa One-China principle.

Gidayeg usab nila ang pagpirma sa Memorandum of Understanding sa Cooperation on the Belt and Road Initiative. Ug ang kontribusyon sa rehiyon apil na ang Master Plan on ASEAN Connectivity (MPAC) 2025.

Giangkon usab nila nga gikinahanglan ang defense and military cooperation  nga usa sa mga importanteng sangkap sa maayong relasyon sa mga nasud kay nakatampo kini sa kalinaw ug kahapsay sa rehiyon.

Nipirma usab sila og MOU sa Defense Cooperation ug batokan ang terorismo, humanitarian assistance, disaster response and mitigation, ug peacekeeping operations.

Nagbinayloay usab og panahom ang duh aka lider bahin sa isyu sa South China Sea diin pareho silang uyon nga importante ang kalinaw ug gawasnong paglawig ug paglupad sa maong dapit.

Pareho usab silang misaad nga sulbaron ang kasungian sa SCS sa malinawong paagi ug parehong maglikay paggamit og kusog ug direktang makig-estorya sa mga nasud lamang nga nalambigit subay sa prinsipyong gisunod sa international law ug Charter of the United Nations ug ingon man sa 1982 UNCLOS.

Gawas sa joint-statements, nipirma usab ang duh aka nasud sa 29 ka mga kasabotan nga naglambigit sa negosyo, imprastraktura, panglawas, edukasyon, teknolohiya, pangisdaan, agrikultura ug uban pa. -IBM/(BANAT NEWS)