Call center agent, sikyu gipamusil patay

CEBU, Philippines — Duha ang patay sa nahitabong pagpamusil dinhi sa Dakbayan sa Sugbo niadong Biyernes sa gabii ug kagahapon sa kaadlawon diin usa sa mga biktima babayeng call center agent.

Sa nahitabong pagpamusil sa may Joseville Subdivision, Sitio Upper, Barangay Bacayan, ning Dakbayan sa Sugbo kagahapon sa kaadlawon napatay si Christina Jayson, 25, temporaryong nagpuyo sa maong lugar.

Matud pa ni Police Officer 3 Joseph Grande, Desk Officer sa Talamban Police Station nagbarug daplin sa karsada ang biktima sa dihang kalit kini nga gipusil sa wala mailhing mamumuno.

Si Senior Supt. Royina Garma ang City director sa Cebu City Police Office miingon nga nagpahigayon na sila og imbestigasyon ug gipaabot niya nga mokooperar kanila ang pamilya sa biktima aron makakuha sila og dugang mga impormasyon.

Apan gisaway ni Mayor Tomas Osmeña ang kapolisan kay dili makaprotekta sa mga tawong nagtrabaho sa gabii.

"We have to commute BPO agents, nurses and other night time workers to and from work because the police cannot protect them," matud niya.

Ang bag-ong free bus rides sa mga trabahante sa gabii nahimugso human dunay namatay nga call center agent pila ka mga semana na ang milabay.

Matud ni Osmeña nga bisan og kulang ang presensya sa kapolisan sa dalan sa siyudad, padayon gihapon silang gisuportahan sa dakbayan pinaagi s a 94 ka mga sakyanan sa siyudad diha sa CCPO ,  fuel subsidy ug maintenance sa maong mga sakyanan.Aduna sab P100 million alang sa incentives sa mga polis sa siyudad.

"The city government won't give up on peace and order in spite of the absence of police visibility (except for the SOCO that shows up after the killings)" dugang pa niya.Giawhag ni Garma ang publiko nga kanunay magmabinantayon sa ilang mga paglakaw ug kung aduna silay mga hulga nga madawat mas maayong ipa- blotter kini dayon sa kapolisan aron maimbestigahan ug mapugngan nga dunay dautang mahitabo kanila.

Giangkon ni Garma nga tungod sa kadako sa populasyon sa siyudad ug daghan na kaayo ang Business Process Outsourcing diin magtrabaho kining mga call center agents dili gayud maato sila pagbantay sa kapulisan.

Gihangop hinuon ni Garma kining gitanyag nga libreng sakay sa Cebu City Government alang sa mga call center agents ug labing maayo kon kini himuon nga "door to door" alang  kaniya.

Sa laing pagpamusil, wala na maka-uli sa ilaha gikan sa iyang trabaho ang security guard nga si Marcial Rezaba, 39, taga Sitio Mahayahay II, Barangay Pasil ning siyudad dihang kini gipusil samtang nagsakay og pasaheroan nga sakyanan atubangan nga bahin sa Don Vicente Rama National High School, Macopa Street, Barangay Basak San Nicolas ning Dakbayan sa Sugbo niadtong Biyernes sa gabii. Wala pa matino kon kinsa sila ug ang ilang motibo. (Jean Marvette Demecillo/IBM)(BANATNEWS)