2 kuratong nadakpan

CEBU, Philippines — Duha ka gipasanginlang miyembro sa organisado nga crime group sa Ozamiz City nga Kuratong Baleleng ang nangadakpan sa ilang gitagoan sa Villa Cilla, Barangay Poblacion, sa Lungsod sa Liloan.

Niadtong hapon sa adlaw nga Biyernes, ang operatiba sa Regional Special Operations Group (RSOG) sa Police Regional Office sa Central Visayas (PRO-7) milusad og operasyon pagsikop kanila ni Richard Cabrellos Obagan alyas Richie,48, ug Jacinto Dela Cruz  Obagan, 29 .

Giingon nga ang duha sakop sa Ardot Parojinog Group. Apil usab sila sa mga suspek sa pagpatay sa barangay kagawad sa Barangay Malaubong, Ozamiz City nga si Jerry Salvador pipila ka buwan na ang nakalabay.

Sumala pa nga dinhi nagpabugnaw ang duha human sa maong krimen apan nalutsan sila og warrant of arrest sa kasong pagpatay gikan ni Judge Roy Murallon, sa Regional Trial Court Branch 35 sa Judicial Region sa Ozamiz City.

Wala ra misukol ang duha pagsikop kanila sa kapulisan.  Naa ang duha karon gibalhog sa Abellana Police Station  ug gikatakdang ibiyahe padung sa Ozamiz City.

Sigon sa deputy chief sa RSOG nga si Senior Inspector Ricardo Tero ila pang gisubay kung unsa kalawom ang impluwensiya sa duha sa Kuratong Baleleng nga grupo.  Ila sad gitutukan kung naa pa ni lain kauban sa Sugbu.

"Mao pa sad na amo gitagaan karon og atensyon kung unsa ni sila ka influential sa ubang members. Gi-follow-up karon kung unsa na kalawom ang involvement nila sa grupo if ma-consider ba sila nga leaders,” sigon pa ni Tero. (/IBM)(BANATNEWS)