CEBU, Philippines – Gumikan sa nagpadayong road concreting sa northbound lane sa Vestil Street sa Barangay Mambaling ang mga pasahero ug motorista nakasinati og kahuot sa dagan sa trapiko.
Sukad niadtong buwan sa Oktubre niining tuiga usa lang ka lane sa northbound ang magamit sa mga sakyanan gumikan sa road concreting sa proyekto sa Department of Public Works and Highways (DPWH)-7.
Ang operations chief sa Cebu City Transportation Office Francisco Ouano nagkanahon nga ilang naobserbahan nga ang dagan sa trapiko sa maong dapit huot sukad niadtong adlaw’ng Lunes ilabi na sa peak hours gikan sa alas 6:00 hangtod sa alas 10:00 sa buntag ug alas 4:00 sa hapon ngadto sa alas 9:00 sa gabii. Ang northbound vehicles makasinati og kahuot sa dagan sa trapiko gikan sa Mambaling access road hangtod na sa mga main thorough fares.
Sukad niadtong buwan sa Agosto sa tuig 2017 dili lang mga pribadong sakyanan ang gitugotan nga moagi diha sa Cebu South Coastal Road(CSCR) human ang tanang northbound ug southbound nga mga bus, mini bus ug delivery trucks anha na usab paagion gumikan sa nagpadayon nga konstraksiyon sa underpass project diha sa Natalio Bacalso Avenue.
Nunot niini, epektibo niadtong Martes sa hapon ang access road duol sa shopping mall nga nagamit alang sa north ug south bound vehicles aron makatabang nga maluag-loagan ang trapiko.
Gawas niini, upat ka traffic enforcers ang gi-assign nga nagbantay sa trapiko diha sa maong dapit.
Matud ni Ouano nga gibana-bana nga mahuman ang proyekto sa buwan sa Disyembre niining tuiga. (/BDB)(BANAT NEWS)