Sec. Cimatu gipakigkitaan ni Chiong

CEBU, Philippines — Paaboton sa kagamhanan sa Siyudad sa Naga ang rekomendasyon gikan sa Department of Environment and Natural Resources nga makabalik na sa ilang pinuy-anan ang pipila ka evacuees gikan sa mga lugar nga peligro sa landslide.

Niadtong Lunes sa hapon nipasabot si Mayor Kristine Vannesa Chiong sa tanang kapitan sa dakbayan ug sa mga tigbalita nga iyang gituyo sa pagbisita si DENR Secretary Roy Cimatu aron ipaabot ang estado sa iyang mga konstituwente.

Matud ni Chiong nga adunay mga report human sa inspeksyon apan wala’y igong rekomendasyon ang maong buhatan aron makahimo sila og lakang.

“Mas maayo gyud nga maneguro ta,” asoy pa ni Chiong.

Si Chiong nipahibawo nga aduna pay 900 ka pamilya nga nagpuyo gihapon sa dapit sa nahitabong landslide nga gikatakdang ipahiklin human sa pagtuon nga gihimo ang Mines and Geosciences Bureau (MGB) sa giila nga “red zones” o ang lugar nga gidili nga puy-an gumikan sa peligro.

Moabot sa 2,800 ka pamilya ang nagpuyo sa “green zone” o ang giila nga lugar nga dili kaayo peligro apan dili na mahimong puy-an.

Sumala pa ni Chiong nga gipaabot nila ang assessment sa DENR kun pila sa 1,835 ka pamilya nga naa sa 10 ka evacuation centers ang pwede na nga makauli sa ilang panimaye.

Ang siyudad naa karon sa pagproseso sa ilang pinansyal nga hinabang sa moabot 444 ka pamilya kinsa direkta gyud nga naapektuhan sa panghitabo.

Tulo ang pilian sa mga apektadong pamilya alang sa hinabang nga ilang madawat.

Sa 444 ka pamilyang apektado, niabot sa 250 ka pamilya nga naapektuhan ang nidawat sa unang tanyag nga adto sila sa Balili Property mopahiluna. Sa ikaduhang pilianan, nitanyag sab ang siyudad og relocation site sa Valencia, Siyudad sa Carcar nga ugmaron sa National Housing Authority (NHA).

Samtang ang pamilya nga dili mopili sa relocation site hatagan og P50 mil nga relocation assistance diin aduna say P50 mil nga humanitarian financial assistance ug laing P50 mil sa sunod tuig kun ang ilang panimaye naguba gyud sa pagdahili sa yuta samtang P25 mil ang partially damaged.

Si Chiong nidugang nga adunay financial assistance nga madawat sa una ug ikaduhang pilianan tungod kay samtang gitukod pa ang mga relocation site, adunay magamit nga ikapangabang ang mga apektadong pamilya. -/GMR (BANATNEWS)