CEBU, Philippines — Nag-atubang og kasong rape ang usa ka 19-anyos nga drayber sa habal-habal tungod sa giingong paglugos niini sa iyang pasahero.
Gipasaka sa city prosecutors office ngadto sa korte ang two counts of rape batok sa suspetsado human nasuta nga dunay igong basehan.
Ang biktima ug suspetsado parehong nagpuyo sa samang barangay sa Dakbayan sa Sugbo.
Ang biktima kinsa usa ka estudyante sa grade 12 nibutyag nga niadtong Oktubre 27, 2018 sa alas 11:00 sa gabii human nitambong og birthday party sa iyang higala diha sa samang barangay nisakay sa motorsiklo sa suspetsado paingon nang mopauli.
Matud sa biktima nga ang suspetsado nangangkon nga drayber siya sa habal-habal ug kaila sa manghud niya nga lalaki hinungdan nga nisakay siya aron magpahatud.
Ang 19-anyos nga biktima nireklamo tungod kay nilapas na sila sa ilang balay ug nagpasutoy na hinuon og padagan sa motorsiklo ang suspetsado ug didto siya gidala dapit sa usa ka dam.
Ang biktima nangangkon nga wala siya mosinggit og panabang tungod sa iyang kahadlok.
Matud usab sa biktima nga adunay tawo nga nagpaingon diha sa lugar ug gimanduan siya sa suspetsado nga dili mosaba ug nipunit kini og bato. Giingong ang suspetsado nipadagan og usab sa iyang motorsiklo palayo diha sa dam ug gidala niini ang biktima diha sa silingan nga barangay diin didto niya kini giamong-amongan ug pagkahuman gihatud sa suspetsado ang biktima diha duol sa balay niini.
Ang inahan, higala ug igsuon sa biktima nakabantay nga nagkadugo ang short pants niini hinungdan nga nisumbong ang biktima sa gibuhat sa suspetsado kaniya.
Ang suspetsado gipangita sa igsuon sa biktima ug gisignit kini dihang nakit-an ug gitugyan ngadto sa mga polis. (BANAT NEWS)