Crisis center sa kababayen-an tukuron sa Mandaue
CEBU, Philippines — Tukuron sa Mandaue City District Hospital ang one-stop crisis center alang sa mga babaye nga biktima sa pangabuso.
Si Atty. Elaine Bathan, chief of staff ni Mayor Gabriel Luis Quisumbing, nitataw nga gawas sa medical services, makahatag sab sila og legal services ug consultation.
Proyekto kini sa Zonta Club of Cebu II, usa ka organisasyon nga dunay adbokasiya sa women empowerment diin tumong niini ang paghunong sa violence against women.
Si Marilou Canizares, chairperson sa Zonta, nitataw nga ang proyekto subay sa "Abay Sa Kahayag" karong Nobiyembre 23 hangtud Disyembre 10.
Gawas sa mga babaye, posible sab makapadangat sa ilang reklamo sa abuso ang lesbian, gay, bisexual and transgender (LGBT) community ug mga bata.
Sa district hospital lang una ang maong crisis center nga matud ni Bathan duol ra kini sa City Social Welfare Services Office ug sa Women and Children Protection Desk sa Mandaue City Police Office diin makahimo kini sila og koordinasyon sa biktima sa pangabuso.
Dugang ni Bathan mohimo pa sila og feasibility study sa pagtukod sa maong crisis center diin mag-hire sila og volunteer doctors ug social workers nga moatiman sa mga biktima. (BANAT NEWS)
- Latest
