Sugyot sa DPS suportahan sa oposisyon

CEBU, Philippines – Suportahan sa mga oposisyon nga konsehal ang giduso sa Department of Public Services nga  mopalit og 21 ka compactor trucks nga mokabat tanan ngadto sa P232 milyones.

Tumong niini nga momenos ang gasto sa siyudad sa pagkolekta sa mga basura sa sunod tuig.

Apan si Konsehal Jocelyn Pesquera nangkanayon nga tukion una nila kon tukma ang giduso nga P11 milyones nga presyo kada compactor truck.

Matud ni Pesquera nga dugay nang nangusog ang oposisyon nga mopalit og garbage trucks ug dili na lang morenta og mga truck ug mo-hire og private haulers nga maoy molabay sa basura sa siyudad.

Ang DPS niduso og P692 milyones ubos sa gisugyot nga P8.1 bilyones nga budget sa sunod tuig.

Sa P692 milyones lakip na niini ang P201.3 milyones alang sa garbage collection, P64.5 milyones nga renta sa garbage trucks gikan sa buwan sa Enero hangtud sa buwan sa Hunyo ug P232.5 milyones alang sa pagpamalit og compactor trucks.

Karong tuiga, nikabat ngadto sa P420 milyones ang nagasto sa siyudad alang sa 200,000 ka toneladang basura nga nakolekta ug ilabay tungod sa pagrenta og garbage trucks ug pag-hire og private hauler.

Si Konsehal Joel Garganera sa iyang bahin, nagkanayon nga si Mayor Tomas Osmeña nagsige og batikos sa nilabay’ng administrasyon.

Matud ni Garganera nga ang kanhi administrasyon  nigasto lang kaniadto og subra sa P100 milyones sa usa ka tuig sa pagpangolekta sa basura ug paglabay niini.

Apan si DPS assistant department head John Paul Gelasque nagkanayon nga nakaamgo ang departamento nga mas makabarato ang siyudad nga mopalit og garbage trucks.

Ug ang siyudad magbayad na lang unya kini og P700 matag tonelada alang sa tipping fee sa mga basura. (/BDB)(BANAT NEWS)