Waterfront Police gidayeg kay daling nakasulbad sa kaso
CEBU, Philippines – Gidayeg ni Police Senior Supt. Royina Garma, direktor sa Cebu City Police Office (CCPO), ang Waterfront Police Station (CCPO Station 2) human dali nilang nasulbad ang kasong pagpatay sa 23-anyos nga dalaga sa Barangay Tinago sulod lang sa duha ka adlaw.
Apan matud ni Garma nga wala silay ikahatag nga cash reward sa kapolisan sa maong presinto.
Iya sab giklaro nga dili gikan sa ilang bulsa ang gitanyag nga singko mil pesos ngadto sa Mabolo Police Station dihang nasulbad nila ang kaso sa gipatay nga Korean National nga si Young Ho Lee kay giingong gikan ang maong salapi sa Embahada sa South Korea.
Dugang niini daku og natabang ang kooperasyon sa nakasaksi sa maong krimen ngadto sa kapolisan hinungdan sa pagsulbad dayon sa maong kaso.
“Yung mga witnesses kasi doon nagcooperate sa mga polis kaya madali lang yung follow up natin,” siya miingon.
Ang hepe sa Waterfront Police Station nga si Police Senior Inspector Joemar Pomarejos nagkanayon nga pormal na nga gipasakaan nila og kasong robbery with homicide ang suspek nga si Emelito Torrejos Familiar, 23-anyos kagahapong adlawa.
Si Familiar ang gitumbok nga mipatay sa working student nga si Charie Mae Mancia ug mikuha sa cellphone niini niadtong Nobyimbre 4.
Matud pa nga pagpangawat gyud ang tumong ni Familiar.
“Background sa suspect basta naay gamay lang nga resistance sa victim, iyaha gyud nang dunggabon. Mao nay information nga atong nakuha,” nagkanayon si Pomarejos.
Nasayran nga nadakpan na niadtong tuig 2103 si Familiar sa kasong pagpanulis ug bag-o ra kining nakagawas sa bilanggoan niadtong buwan sa Agosto karong tuiga.
Himuong saksi ang duha ka mga higala niini nga iyang gidangpan human sa krimen aron mangayo og tubig nga gihugas sa iyang lawas nga nagkadugo ug nangayo sab og senina aron iilis sa iyang nagkadugo nga sapot.
“Naka-execute na sila og affidavit nga nakapakusog pud pagduot sa iyaha being the suspect sa pagdunggab ug pagpatay ni Charie Mae Mancia,” dugang ni Pomarejos. (/DILT)(BANAT NEWS)
- Latest
