Mga mananagat sa Talisay nagpalaban kang Bacaltos
CEBU, Philippines – Nidangop kagahapon sa buntag ngadto sa buhatan ni Konsehal Antonio Bacaltos, Jr. sa Dakbayan sa Talisay ang 40 ka mananagat sa Barangay Tanke ug San Roque nga mga barangay sa siyudad.
Si Bacaltos maoy chairman sa committee on fisheries and aquatic resources sa konseho sa siyudad.
Ang maong mga mananagat nipadayag kang Bacaltos sa ilang kasagmuyo ngadto sa mga barko nga mag-agian ug magpundo sa kadagatan sa siyudad tungod kay giingong paligsan ang ilang mga pukot ug abogon usab sila kong managat.
Si Dondon Caballero, presidente sa mga mananagat nagkanayon nga dakong epekto kanila ang pagkaguba sa ilang mga pukot tungod kay mao man kini ang ilang panginabuhian.
Si Bacaltos sa iyang bahin, nagkanayon nga makig-alayon siya sa Cebu Port Authority (CPA) aron mapatawag ang mga nagdumala sa barko nga mag-agian ug magpundo sa kadagatan sa siyudad.
Ang mga mananagat nangayo kini og katin-awan kang Bacaltos kong asa dapita sa kadagatan sa siyudad nga pwede silang makapanagat.
Si Bacaltos nanghinaot nga mahatagan og pagtagad ang iyang hangyo aron usab masulbad ang nahisgutang problema. (/BDB)(BANAT NEWS)
- Latest
