Mandaue naproblema sa luna

CEBU, Philippines – Gitinguha ni Mayor Gabriel Luis Quisumbing nga makapatukod pa og dugang classrooms diha sa mga publikong tulunghaan sa  Dakbayan  sa Mandaue.

Apan nahimong problema karon ang pagpangita og mga luna nga kapahimutangan sa tukoron nga mga school building.

Usa sa nakita ni Quisumbing nga kasulbaran sa nahisgutang problema mao ang pagbawi sa mga luna nga gipanag-iya sa kagamhanan sa siyudad nga gigamit sa pribado ug nakitang dunay mga kakulian.

Si Quisumbing nipasabot  nga paghatag og maayong edukasyon sa kabataan sa Dakbayan sa Mandaue maoy labing mahinungdanong kahimanan alang sa pagpalambo sa ilang panginabuhi sa umaabot.

Sa gipahigayon nga State of the Children’s Address (SOCA) niadtong niaging adlaw  gihimug-atan ni Quisumbing ang kamahinungdanon  sa paghatag og edukasyon sa kabataan sa dakbayan. Subay niini, giangkon ni Quisumbing ang kakuwang sa mga luna nga katukoran sa dugang school building.

Dugang ni Quisumbing nga adunay mga luna ang kagamhanan  sa Dakbayan sa Mandaue nga ilang nadiskubrehan nga kuwestiyonable ang  gihimong kasabotan ug ilaha  kining pangitaan og paagi ang pagbawi  niini ubos sa katuyoan nga magamit kini sa mga proyekto nga ipatuman nga naglakip sa bag-ong tulunghaan nga tukuron,  housing projects ug mga buhatan  sa kagamhanan. (/BDB)(BANAT NEWS)