CEBU, Philippines – Pabilin pa nga nagpaalim sulod sa tambalanan ang usa ka lalaking gidudahan nga tigpayuhot og ilegal nga drugas human siya gipusil sa Sitio Campo 2, Barangay Jaclupan, Dakbayan sa Talisay niadtong Lunes sa hapon.
Ang biktima mao si Wilson Ornopia, 37-anyos, nagpuyo sa maong dapit samtang wala nailhi ang duha ka mamumuno nga nagsakay og motorsiklo.
Sa inisyal nga imbestigasyon sa kapolisan nasuta nga nagmaneho sa iyang motorsiklo ang biktima kuyog sa iyang pag-umangkon nga si Jundel Labajo nga paingon sa Barangay Tabunok.
Apan pag-abot sa nahisgutang lugar nibutho sa ilang luyo ang duha ka lalaking nagmotorsiklo nga nagsul-ob og maskara ingon man helmet dayon pusil sa biktima.
Naigo sa iyang ulo ug liog ang biktima hinungdan sa iyang pagkahagba.
Ang mga lalaking nipusil nisirit lang dayon palayo sa lugar samtang gidala sa Talisay City District Hospital ang biktima apan gibalhin sa South General Hospital.
Base sa mga estorya sa mga nakaila sa biktima nga nalambigit kini sa pagpamaligya og ilegal nga drugas hinungdan nga usa sa gitan-aw sa mga awtoridad ang mao nga anggulo sa pamasin nga adunay kini gikakontra sa ilegal nga negosyo. (/GMR)(BANAT NEWS)