CEBU, Philippines — Usa ang Carreta Cemetery sa pinakadako nga sam-ang sa Siyudad sa Sugbo ug hugot nga gibantayan sa mga tinugyanan sa balaod panahon sa pag-obserbar sa kalag-kalag.
Ang caretaker sa maong sam-ang mao si Jesus Desuyo sulod na sa 11 ka tuig sugod niadtong June 27, 2008 hantod karon.
Base sa nahibaw-an ni Desuyo ang Carreta Cemetery gitukod panahon sa mga Kastila ug gani makita sa ibabaw nga bahin sa estraktura sa sam-ang makita nga 1906 kini natukod.
Naagian kini og mga linog ug nakaangkon og kadaot ug ang labing kusog mao kadtong 7.2 magnitude nga linog pipila palang ka tuig ang nakalabay.
Gitan-aw kini sa National Heritage Commission ug ilaha kining gi-restore ug gi-repair hinungdan nga makita karon nga ang orihinal nga istura sa edipisyo.
“Gi-repair nila mga hapit usa ka tuig gyud nakompleto. Gi-turnover sa atoa diri sa Cathedral sa atong Archdiocese atong hinapos sa bulan sa Nobiyembre sa miaging tuig,” asoy ni Desuyo.
Matud ni Desuyo nga daghang mga ilado ug dagkong tawo nga gilubong sa maong sam-ang, usa sa iyahang nahibaw-an ang kaliwat sa mga Gullas.
“Pagkakaron wala na sila diri, gibalhin na ang mga bukog sa ginikanan nila ni Sir Eddie (Mayor Eduardo “Eddiegul” Gullas), ang nagpabilin nalang karon dinhi ang estraktura sa ilahang mausoleum makita nato apan bakante na,” dugang ni Desuyo.
Matud pa dunay say mga local folk heroes sa maong sam-ang apan dili na makahatag og ngalan si Desuyo sanglit dugay na sab kini ug sa iyang pag-abot sa sam-ang wala sad sila’y records.
Gihulagway ni Desuyo ang Carreta Cemetery uban sa Sto. Rosario moabot sa upat ektarya kapin ug kulang ang gilapdon.
Adunay mga kakulian sa pagdumala sa sam-ang ilabi na kining mga namuyo sa sud bisan asa lang molabay sa ilang hugaw.
Matod niya nga tinguha sa simbahan nga malimpyo gyud ang Carreta nga wala na gyuy mamuyo tugutan sila makapaninda apan panahon sa kagabhion mopauli sila sa ilang panimalay. (/IBM)(BANATNEWS)