Mga nakalas sa trahedya sa Lauis Ledge wa nay niduaw

CEBU, Philippines — Pipila sa mga gilubong diha sa Carreta Cemetery kadtong mga nakalas sa nahitabong trahedya sa kadagatan sa dakbayan sa Talisay niadtong Agosto 16, 2013.

Kahinumduman sa maong petsa ug tuig nahitabo ang panagbangga sa MV St. Thomas de Aquinas ug Sulpicio Express Siete diin daghang kinabuhi ang nakalas.

Sa pagkutlo ning maong balita ang lugar kon diin gilubong ang mga nakalas nga hangtod karon wala gyud mailhi nabantayan nga mingaw ug wala’y mibisita subay na niining pag-obserbar sa kalag-kalag.

Si Jesus Desuyo, caretaker sa Carreta Cemetery miasoy wala’y mga tagtungod nga miduol ug mibisita sa dapit kon diin gilubong ang mga nakalas.

Dugang ni Desuyo sa mga nanglabay nga katuigan may mga mohalad og pag-ampo ug buwak sa mga namatay apan mga sakop sila sa 2GO shipping company nga maoy tagiya sa MV St. Thomas de Aquinas.

“Sa milabay nga mga tuig naay mobisita diri pero ang kaning mga personnel sa 2GO apan wala gyu’y miduaw nako diri nangutana nako kabahin sa mga tagtungod sa mga nangamatay atong nabangga nga barko,” asoy ni Desuyo.

Dugang ni Desuyo nagpabilin ang mga namatay sa maong hitabo sanglit ang kontrata nga nasabutan nila sa shipping firm pito ka tuig sila nga magpabilin sa maong nahimutangan.

Gibana-bana ni Desuyo nga dili moubos sa 50 ang gilubong sa maong sam-ang nga namatay sa trahedya. Gipaabot nga sunod tuig habwaon na kini ug ibutang sa bone chamber sa maong sam-ang kon aduna nay mogamit sa maong mga nitso. Apan kung pananglitan nga dunay laing  mogamit hipuson nila ang mga bukog ug ibutang sa dakong krus aron didto nalang modagkot og kandila ingon man mohalad og pag-ampo.( /IBM)(BANATNEWS)