Pamilya gipamusil,duha angol

CEBU, Philippines – Duha ka mga membro sa usa ka pamilya ang nangaangol human gipamusil sa ilang silingan samtang sila nanan-aw og telebisyon sulod sa ilang panimalay sa Sitio Ylaya, Barangay Canasujan, Dakbayan sa Carcar niadtong Lunes sa gabii.

Wa magdahom ang pamilyang Eramil nga tinud-on sa ilang silingan ang bahad niini nga patyon ang usa sa mga anak nga si Raymon Eramil, 24.

Matud pa ni Police Supt. Melbert Glade Esguerra, Deputy Provincial Director sa Cebu Provincial Police Office, nga nagtan-aw ra og telebisyon ang mga biktima nga silang Lorna Eramil, 45, inahan ug mga anak niini nga silang Jennylou Eramil, 22, Gerry Eramil ,26, ug si Raymon.

Sa dihang nisulod sa ilang balay ang suspetsadong si Samo Sardido Sanchez ,31, ug diretso silang gipamusil niini.

Naigo sa ilang mga tiil silang Lorna ug Jennylou samtang nakadagan palayo ang mga lalaking igsuon. Anaa na sa luwas nga kahimtang ang mga nangaangol human nadala sa tambalanan.

Kagahapon miadto si Sanchez sa kapolisan aron limpyohan ang iyang pangalan kay matud niya kapangalan ra niya ang suspetsado.

Apan sumala pa ni Police Officer 1 Francisco Saberon nga sa dihang nag-abot sa presinto si Raymon ug si Sanchez positibo kining gitumbok sa mga biktima.

“Before sa incident, nagbahad-bahad na kuno ni,” si Saberon miingon.

Giingong aduna silay personal nga kasungi ni Raymon. Kasohan og frustrated murder si Sanchez. (/IBM)(BANAT NEWS)