CEBU, Philippines — Gipusil patay ang usa ka 21 anyos nga lalaki sa usa ka wala pa mailhing mamumuno diha sa Sitio Continental, Barangay Mambaling, Dakbayan sa Sugbo kagahpon sa ala una sa hapon.
Giila sa kapolisan ang biktima nga si James Edward Sillar Hugo, residente sa maong lugar.
Sumala pa sa hepe sa Mambaling Police Station nga si Police Chief Inspector Randy Caballes nga base sa ilang inisyal nga imbestigasyon gisundan sa nag-inusarang mamumuno ang biktima ug pag-abot sa sudlonong bahin sa maong lugar gipusil kini.
Ang iyaan sa biktima nga residente ra sab sa maong dapit nakadungog sa sunod-sunod nga boto sa pusil mao nga milili kini sa gawas ug didto nakita niya ang pag-umangkon nga nagbuy-od na sa yuta ug nagkadugo.
Dali kining nanawag og tabang apan sa pag-abot sa mga sakop sa Emergency Medical Service wala na kini pamulso.
Sa pagangaylap og impormasyon sa kapolisan giingong adunay nakakita nga nagsul-ob og blue nga t-shirt ang gunman kinsang anaa sa 5’5 ang height niini.
“Wala pa mi gitan-aw ng motibo , pero base sa iyaan naa daw ni na kontra pero wala pa mi klaro nga detalye sa pagkakaron,” si Caballes miingon sa Banat News. (BANAT NEWS)