CEBU, Philippines — Gitataw sa tigpamaba sa Police Regional Office-7, Supt. Reyman Tolentin, nga dili gamiton sa operasyon sa drugas ang mga submachine guns nga hinatag sa Kampo Crame apan alang kini sa Internal Security Operations sa tibuok rehiyon. “Ang gi-isyuhan ani ang atoang mga mobile force company because gitahasan ni sila sa internal security operations. Magpatrolya ni sila sa atong kabukiran, this is to really ensure nga atoang mga siyudad, munisipyo walay masaag nga mga dautang mga elemento. While we are sleeping sound at night, atong mga mobile forces are patrolling our areas just in case,” si Tolentin niingon.
Subay sab kini sa Capability Enhancement Program sa kapolisan.
Kagahapon pormal nga gi-turn over sa PRO-7 ang mga hinatag sa Kampo Crame nga mga sakyanan, submachine gun, bullet proof vests ug combat helmets.
Kini gilangkuban sa duha ka klase sa submachine gun nga ginama pa sa Israel; 15 ka kalibre 5.56 ug 10 ka kalibre 7.62. Paresan kini og mga ballistic vest level III-A ug mga Kevlar helmets.
Tug-an ni Tolentin nga kuwangan gihapon ang mga ballistic vests sa kapolisan sa tibuok Rehiyon 7 apan maayo na lang kay anam-anam na kining gipun-an.
“Naa tay 9,500 police sa tibuok region, so ang atong Kevlar gamay pa gyud. Wa pa gani 3/4. Kung naay issue ani sa police daku kaayo ni og matabang sa pag-ensure sa ilang safety,” matud niya.
May 15 sab ka patrol cars nga Toyota Hi-Lux diin tagduha ang madawat sa Cebu City Police Office ug Lapu-Lapu City PO; tagtulo ang Cebu Provincial PO ug Mandaue City PO; upat sa Negros Oriental Provincial PO; ug usa sa Siquijor Provincial PO. Ang pwersa sa Highway Patrol Group (HPG) gihatagan sab og 15 ka bag-ong motorsiklo. (BANAT NEWS)