CEBU, Philippines — Nabalaka ang Department of Health sa kataas sa pagsaka sa kaso sa tipdas sa Central Visayas itandi sa nilabay nga tuig.
Sa Enero hangtud Oktubre sa niaging tuig, adunay 44 ka kaso ug walay patay samtang karong tuiga adunay 290 ka kaso ug usa ang patay.
Nag-una sa top 5 sa listahan mao ang Dumaguete City, Bacong, Cebu City, Sibulan ug Larena.
Tungod sa kataas sa porsyento sa pagsaka, ang DOH-7 mopahigayon og mass immunization ilabi na sa kabataan karong katapusan sa buwan sa Oktubre o sa Nobiyembre.
Matud ni Ruff Vincent Valdevieso, program coordinator sa Expanded Immunization Program sa DOH, nga ilang himoon ang pagpamakuna aron sa pagseguro nga ang maong sakit dili makalipang tungod kay ang mga bata edad og unom ka buwan hangtud 59 ka buwan kinahanglan makadawat og one dose vaccine sa measles, mumps ug rubella o ang MMR.
Ang hinungdan sa pagsaka sa kaso sa tipdas tungod sa kanihit sa mga tawo nga ni-avail sa libreng pagpamakuna nga gihatag sa mga local health centers.
Giklaro ni Valdevieso nga luwas ug epektibo nga pangontra sa tipdas ang ilang mga bakuna ug dili angay mabalaka ang mga ginikanan.
Niadtong Marso sa nilabay nga tuig, ang Negros Oriental nideklarar og outbreak tungod sa pagsaka sa measles cases nga gisundan sa Siquijor.
Si Valdevieso nitug-an nga kung mabatyagan sa mga ginikanan nga giubo ang ilang anak, magpuwa ang mata ug magluha, adunay skin rushes ug gihilantan, kinahanglan ipasusi na kini sa doktor ug dili pasagdan kay ang measles mahimong makamatay ilabi na sa mga bata tungod kay moresulta kini sa secondary infections sama sa respiratory diseases ug pneumonia. (BANAT NEWS)