Hideout sa mga kawatan puhagon
CEBU, Philippines – Hugtan sa kapolisan sa Rehiyon 7 ang seguridad batok sa mga kawatan nga posibleng mosiaw sa nagsingabot nga holiday season.
Ang direktor sa kapolisan sa rehiyon, Chief Superintendent Debold Sinas, niingon nga ilang prayoridad ang mga barangay nga daganan sa mga kawatan.
“Ang amo focus karon mao ang lugar nga daganan sa kawatan, mag-conduct og more raids, more patrolya, if dili na ma-correct, bisan unsa pa kadaghan ang polis nagpatrolya if di makuha ang hideout di na maubos,” sigun pa ni Sinas.
Wala pa hinoon hisguti ni Sinas kung asa nga barangay apan siya niingon nga kini ang iyang direktiba sa tanang direktor sa kapolisan aron masulbad o maminusan ang kaso sa pagpangawat.
Tambag ni Sinas sa katawhan nga dili magdala og daghang kwarta ug dili biyaan ang balay nga wala’y tawo.
Pananglit maabot sa tulis, nisugyot si Sinas nga ihatag na lang kaysa mamatay pa.
“Unta kung manlakaw dili lang mag-ingon nga datu, nga ipakita gyud ang iyang mga valuables, simple lang aron di pud matintal ang mga kawatan,” matud niya. (/GMR)(BANAT NEWS)
- Latest
