Way labot ang CV sa P10 nga pletihan

CEBU, Philippines — Gipahibalo sa mga opisyal sa Land Transportation Franchising and Regulatory Board nga way labot ang Cebu ug ang tibuok Central Visayas sa P10 jeepney minimum fare nga ilang gipatuman sa Luzon.

Si LTFRB chairman Martin Delgra ug LTFRB-7 regional director Eduardo Montealto miingon nga didto lang sa Region 3 (Central Luzon), Region 4 (Southern Tagalog) ug National Capital Region gihimong P10 ang minimum nga pletihan.

Matud pang Delgra ang pagsanong sa fare hike petition sa transport groups sa Manila sugdan sa pagpatuman sa sayong bahin sa bulan sa Nobiyembre human sa kinse ka adlaw nga publikasyon.

Ang pamahayag sa duha ka opisyal gihimo aron malikayang magkabikil unya ang mga pasahero ug mga drayber dinhi sa Sugbo nga posibleng moinsister nga P10 na ang minimum fare.

Matud pang Montealto ang P2.50 provisional fare hike petition nga giduso sa Basak-Lapulapu City Jeepney Operators and Drivers Association pending pa karon.

“Nagpaabot pa mi sa data sa National Economic Development Authority,” si Montealto miingon bahin sa kon tugotan ang maong petisyon.

Ang minimum nga pletihan sa Central Visayas mamahimo unyang P9.00 kon matugotan ang maong petisyon apan sa pagkakaron magpabilin kining P6.50. (Gikan sa The Freeman/IBM)