CEBU, Philippines – Ang bus ug mini bus operators niawhag sa publiko sa pagtambong sa public hearing alang sa usbaw sa pletehan karong Nobiyembre 9, 2018 sa ala 1:00 sa hapon diin ipahibawo unya nila kong asa kining dapita ipahigayon.
Si Julie Flores, pangulo sa bus ug mini bus operators nagkanayon nga ilang giawhag ang tanang sumasakay sa pagtambong sa maong public hearing aron mapadangat nila ang ilang mga sentimento ug yangongo.
Matud ni Flores nga P4 ang ilang gipangayo nga usbaw ug P1.50 sa mosunod nga kilometro ug malaumon siya nga makatambong ang katawhan alang sa ilang baruganan.
Si Flores naglaom nga unta ang mga sumasakay makasabot sa ilang hangyo ug walay mobabag sa ilang gipangayo nga usbaw tungod kay panahon pa kini sa P30 ang litro sa gasolina apan karon niabot na og kapin sa P50 ang matag litro.
Dugang ni Flores nga kong mahatagan sila og katumanan sa gipangayo nila nga usbaw sa pletehan andam usab sila nga mopaubos dayon sa pletehan kong mokunhod usab ang matag litro sa gasolina. (BANAT NEWS)