Val Chiong mag-mayor, anak magbise mayor

CEBU, Philippines – Amahan ug anak nga kanhi mayor Valdermar ug incumbent mayor Kristine Vanessa Chiong ang nag-tandem isip mayor ug bise mayor sa Dakbayan sa Naga alang sa 2019 midterm election.

Ang amahan nga Chiong ang magpapiling mayor sa siyudad samtang ang anak ang magpapiling bise mayor.

Kagahapon sa buntag dungan nga niduso sa ilang certificate of candidacy (COC) ang amahan ug anak nga Chiong uban sa ilang konsehales.

Si Vanessa nagkanayon nga dili ang trahediya sa landslide maoy hinungdan nga dili siya magpapili pag-usab isip mayor sa siyudad apan sa wala pa ang maong trahediya mao na kini ang ilang nasabotan ug sa iyang amahan.

Ang kasamtangang bise mayor nga si Othelo “Boy” Chiong mopahuway na kini sa politika.

Sa grupo nila ni Chiong adunay mga last termer nga konsehal nga gilangkuban nila ni Rodrigo Navarro, Alexander Lara ug si Carmelino “Junjie” Cruz, Jr.

Ang kompletong lineup nila ni Chiong gilangkuban nila ni Porferio Resaba, Afshin Mark Señor, Justino Dakay, Dominador Libot, Charmaine Navarro, Fortunato Manabat, Virgilio Chiong, Aurelio Alinsonorin, Letecia Abangan ug si Luzminda Lapitan.

Samtang sa Dakbayan sa Talisay ang asawa ni Bise Mayor Alan Bucao nga si Marieta “Yehyen” Bucao kinsa kasamtangang presidente sa Association of Barangay Council (ABC) ug naa karon sa kataposang termino isip kapitan sa Barangay San Isidro giingong maoy mokompleto sa lineup sa grupong Alayon.

Apan si Bise Mayor Bucao nagkanayon nga reserba pa lang ang iyang asawa sa lineup.

Gibutyag ni Bise Mayor Bucao nga si Kongresista Gerald Anthony “Samsam” Gullas ang nitudlo sa iyang asawa nga magkonsehal sa siyudad.

Dugang sa Bise Mayor nga nasabutan na kini sa ilang pamilya diin ilang gitimbangtimbang ang trabaho sa konsehal ug sa presidente sa ABC. (/BDB)(BANAT NEWS)